ДДҲБСТ: «Эмомалӣ Раҳмон-эҳёгари ҷашну анъанаҳои миллии тоҷикон»- баргузории конференсияи илмӣ-назариявӣ ба муносибати Иди байналмилалии Наврӯз

29-уми марти соли 2025 бо ташаббуси Кумитаи иҷроияи Ҳизби Халқии Демократии Тоҷикистон дар вилояти Суғд дар толори Донишгоҳи давлатии ҳуқуқ, бизнес ва сиёсати Тоҷикистон ба муносибати Иди байналмилалии Наврӯз конференсияи илмӣ-назариявӣ таҳти унвони «Эмомалӣ Раҳмон-эҳёгари ҷашну анъанаҳои миллии тоҷикон» бо иштироки муовини якуми Раиси Ҳизби Халқии Демократии Тоҷикистон баргузор гардид.

Нахуст меҳмонон дар саҳни донишгоҳ аз намоиши анъанаҳои миллӣ,  аз ҷумла, ҳунарҳои мардумӣ, таомҳои миллӣ, аллаи модар, маросими хонадоршавии навҷавонони тоҷик, шеъру таронахонӣ, ки муаррифгари расму ойинҳои неку инсонпарваронаи ин ҷашни бостонӣ ва дастовардҳои он дар солҳои соҳибистиқлолии мамлакат буд, боздид ба амал оварданд.

Сипас дар вазъияти тантанавӣ ба як зумра аъзои нави Ҳизби Халқии Демократии Тоҷикистон шаҳодатномаҳои ҳизбӣ супорида шуда, ҳамчунин ба як қатор занони ҳунарманд мошинаҳои дарздӯзӣ тақдим гардиданд.

Ба кори конференсия Раиси Кумитаи иҷроияи Ҳизби Халқии Демократии Тоҷикистон дар вилояти Суғд Ҷаҳонгир Салимзода ҳусни ифтитоҳ бахшида, зикр дошт, Наврӯзи оламафрӯз, ки реша дар умқи таърихи чандинҳазорсолаи халқи тоҷик дорад, рамзи покиву сафо, шодиву нишот, умеду орзуҳои нек ва таҷассумгари суннатҳои волои аҷдодӣ мебошад. Ин ҷашни бузург паёми созандагӣ, бунёдкорӣ, дӯстиву рафоқат ва ҳамдигарфаҳмиро ба дилҳо меорад.

Дар даврони Истиқлоли давлатӣ бо шарофати сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон, ҷашни Наврӯз эҳё гардида, мақоми хоса пайдо кардааст. Имсол ин ҷашни аҷдодии мо бо шодиву нишоти дучанд таҷлил мегардад. Зеро дар остонаи ин иди бостонӣ, мо шоҳиди воқеаҳои фараҳбахш ва таърихӣ:  кушодашавии марзҳои Тоҷикистону Қирғизистон гардидем. Ин иқдоми хирадмандонаи роҳбарони ҳарду кишвар, бешубҳа, ба таҳкими равобити дӯстона, ҳамсоягии нек ва ҳамкориҳои судманди дуҷониба такони ҷиддӣ хоҳад бахшид.

Сипас муовини якуми Раиси Ҳизби Халқии Демократии Тоҷикистон Маликшо Неъматзода суханронӣ намуд. Тавре таъкид ёфт, басо рамзист, ки конфронси имрӯза дар арафаи сафари расмии Сарони давлатҳои Тоҷикистон, Ӯзбекистон ва Қирғизистон ба вилояти Суғди Тоҷикистони азизамон дар рӯзҳои таҷлили Иди байналмилалии Наврӯз баргузор гардида, роҷеъ ба нақши беназири Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон дар эҳё ва густариши ҷашну анъанаҳои миллии тоҷикон мубодилаи афкор менамоем. Зеро Наврӯзи Аҷам яке аз зуҳуроти беназир ва ҷузъи муҳими фарҳанги миллии мо ба шумор рафта, дар тӯли мавҷудияти беш аз шашҳазорсолаи хеш ҳамчун сарчашмаи муҳими ахлоқиву тарбиявӣ барои дар руҳияи бунёдкориву созандагӣ, таҳаммулгароӣ, хештаншиносӣ, зебоипарастӣ,  дӯстию рафоқат, ҳамзистӣ ва некиву накукорӣ тарбия намудани инсоният хизмат ва фарҳанги миллати куҳанбунёду соҳибтамаддуни моро дар арсаи ҷаҳонӣ муаррифӣ намудааст.

Аз ин лиҳоз, Наврӯз ҳамчун маҳсули тафаккур ва андешаи мардуми ориёинажод сарчашмаи ифтихор ва воситаи муҳимтарини худшиносиву худогоҳӣ ба шумор рафта, ба шарофати истиқлоли давлатӣ таҳти сиёсати хирадмандона ва фарҳангпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз нав эҳё ва мақоми байналмилалиро соҳиб гардид. Пешвои муаззами миллат дар мавриди мақоми Наврӯз ва суннату анъанаҳои он дар сарнавишти миллати тоҷик чунин таъкид намудаанд: “Наврӯз барои мо баробар бо Рӯзи истиқлоли давлатӣ бисёр азизу гиромӣ мебошад, зеро маҳз ба шарофати истиқлолу озодӣ мо ойину суннатҳои деринаи миллии худ, аз ҷумла Наврӯзро эҳё намудем. Истиқлол ҳамчун ҳадяи сарнавишти миллат ва Наврӯз чун шоҳсутуни таърихи пурифтихори тоҷикон дар якҷоягӣ пайвандгари наслҳои имрӯзу оянда бо расму ойин ва суннату анъанаҳои гузаштагони некноми мо мебошанд”.

Тавре ки ба ҳамагон маълум аст, дар ибтидои солҳои 90-уми асри гузашта, ки кишвари азизи мо дар гирдоби ҷанги шаҳрвандӣ қарор дошт, арзишҳои милливу маънавӣ, забон ва фарҳанги мо зери хатари нобудӣ қарор гирифта буданд. Дар чунин як лаҳзаи ҳассос ва тақдирсоз, Пешвои муаззами миллат ҷасорати бемисл нишон дода, рисолати таърихии худро дар ҳифзи давлату миллат ва эҳёи арзишҳои аҷдодӣ бар дӯш гирифтанд.

Маҳз бо ташаббус ва роҳбарии хирадмандонаи Пешвои миллат дар саросари кишвар ҷашнҳои миллии  мо – Сада, Наврӯз, Тиргон, Меҳргон ва дигар анъанаҳои неки миллии мо эҳё гардиданд. Ин ҷашнҳо, ки аз умқи таърих сарчашма мегиранд, имрӯз ба рамзи ваҳдати миллӣ, ифтихори ватандорӣ ва ҳифзи мероси фарҳангии мо табдил ёфтаанд.

Тайи солҳои соҳибистиқлолии мамлакат таъмиру азнавсозӣ гардидани зиёда аз 100 ёдгории таърихиву фарҳангӣ, аз ҷумла Қалъаи Хуҷанд, Қалъаи Муғ, шаҳраки Саразм, Осорхонаи Панҷакенти бостонӣ, Осорхонаи академик Бобоҷон Ғафуров, силсилакитоби «Ахтарони адаб», ба ҳар як оилаи кишвар тақдим намудани китоби «Тоҷикон»-и аллома Бобоҷон Ғафуров имкон фароҳам оварданд, ки  эҳсоси ватандӯстиву хештаншиносии  сокинони шарафманди кишвар, махсусан насли ҷавон боз ҳам баланд боло рафта, арзишҳои таърихӣ, суннату анъанаҳо ва расму ойинҳои неки миллиамон эҳё гарданд ва ҳифзу гиромӣ дошта шаванд.

Дар баробари ин,  бузургдошти номи неки аҷдоди шарафмандамон ва баргузор гардидани чорабиниҳои сатҳи байналмилаливу ҷумҳуриявӣ ба ифтихори «2500-солагии Истаравшан», «Соли тамаддуни ориёӣ», «2700-солагии Кӯлоб», «800-солагии Мавлоно Ҷалолиддини Балхӣ», «Соли бузургдошти Имоми Аъзам», «700-солагии шайх Камоли Хуҷандӣ»  «115-солагии академик Бобоҷон Ғафуров», «110-солагии Сайдалӣ Вализода», «130-солагии Ҳоҷӣ Ҳусайни Хатлонӣ», ҳамчунин ба рӯйхати ҷашнвораҳои ЮНЕСКО ворид шудан ва таҷлили Наврӯз, Сада, Меҳргон, «1150-солагии Абӯабдуллоҳи Рӯдакӣ», «100-солагии Мирзо Турсунзода», «100-солагии Зиёдулло Шаҳидӣ», «600-солагии Мавлоно Абдураҳмони Ҷомӣ», «3000-солагии Ҳисор», «700-солагии Мир Сайид Алии Ҳамадонӣ», «5500-солагии Саразм» гувоҳи равшани сиёсати хирадмандонаву фарҳангпарваронаи давлату Ҳукумати мамлакат мебошад.

Имрӯз мо ифтихор мекунем, ки маҳз бо ташаббуси Пешвои муаззами миллат соли нави аҷдодии мо – Наврӯз мақоми байналмилалиро сазовор гардида, Шашмақом, чакан, атласу адрас ва дигар осору арзишҳои бостониамон аз тарафи созмони умумиҷаҳонии ЮНЕСКО ҳамчун мероси фарҳанги башарӣ эътироф шуданд. Ин ҳама имкони таърихӣ дод, тоҷикон дар арсаи ҷаҳон ҳамчун миллати куҳанбунёду тамаддунсоз муаррифӣ гардиданд.

Ташаббуси навбатии Сарвари давлат муҳтарам Эмомалӣ Раҳмон ҷиҳати ба нашр расонидан ва ба ҳар як хонаводаи кишвар туҳфа намудани «Шоҳнома»-и безаволи ҳаким Абулқосим Фирдавсӣ қадами устувор дар роҳи эҳёи ҳофизаи таърихӣ ва эҳтиром ба арзишҳои миллӣ буда, эҳдои аввалин нусхаҳои ин шоҳасар ва дастоварди беназир ба занону модарони тоҷик аз ҷониби Пешвои муаззами миллат шаҳодатгари арҷгузорӣ ба заҳмату ғамхориҳои шабонарӯзии ин сарчашмаву офарандаи ҳаёт мебошад. Зеро Зан-Модар нахустин мураббӣ ва тарбиягари инсон дар руҳияи гиромидошти ҷашну анъанаҳои миллӣ аст.

Раиси муаззами Ҳизби Халқии Демократии Тоҷикистон, Пешвои миллат муҳтарам Эмомалӣ Раҳмон дар суханрониҳои худ пайваста таъкид менамоянд, ки ҷашну анъанаҳои миллӣ ҷузъи фарҳанги миллӣ буда, дар ташаккули худогоҳиву худшиносии мардуми куҳанбунёдамон нақши муҳим доранд. Аз ин рӯ, мо вазифадорем, ки ин мероси гаронбаҳои аҷдодиро ҳифз намуда, ба наслҳои оянда ба мерос гузорем.

Дар идомаи конфронс Шоири халқии Тоҷикистон Толиб Карими Озарахш, доктори илмҳои филология, профессор Нуралӣ Нурзод, номзади илмҳои филология, дотсент Ислом Раҳимов, номзади илмҳои ҳуқуқшиносӣ, дотсент Муқаддас Акилова роҷеъ ба мавзӯи конфронс маърӯзаҳои пурмуҳтаво ироа намуданд.

Пас аз суханрониҳо як зумра фаъолон ва собиқадорони давлатию ҳизбӣ барои саҳми арзанда дар тарғибу ташвиқи ҳадафҳои оинномавию барномавии ҳизб, баланд бардоштани мақоми он дар ҷомеа, мусоидат дар ташкил ва баргузории чорабиниҳои муҳимми сиёсӣ, тақвияти ҳисси худшиносиву худогоҳӣ ва ҷалби мардум ба корҳои созандагӣ бо медали ҷашнии 30-солагии Ҳизби Халқии Демократии Тоҷикистон ва сипосномаҳои Кумитаи Иҷроияи Марказии ҳизб дар вазъияти тантанавӣ қадрдонӣ карда шуданд.

Чорабинӣ бо садо додани Суруди миллии Ҷумҳурии Тоҷикистон ҳусни анҷом пазируфт.

 

Шуъбаи таҳлил ва робита бо ҷомеа