Донишгоҳ: дирӯз ва имрӯз

Донишгоҳи давлатии ҳуқуқ, бизнес ва сиёсати Тоҷикистон дар ислоҳоти қонунгузорӣ “маркази зеҳнӣ” гардида, дар соҳаҳои соҳибкорӣ, фаъолияти тиҷоратӣ ва ҳуқуқи байналхалқӣ мутахассис тайёр мекунад”

  Президенти  Ҷумҳурии Тоҷикистон Эмомалӣ Раҳмон,          

маҷаллаи «Деловой мир», 24.01.1995          

Донишгоҳи давлатии ҳуқуқ, бизнес ва сиёсати Тоҷикистон моҳи августи соли 1993 таъсис ёфта, соли равон ба таъсиси он 30 сол пур мешавад. Дар ин давраи начандон тулонӣ Донишгоҳ тавонист, ки ба яке аз донишгоҳҳои бонуфузтарини кишвар мубаддал гардад ва дар даҳгонаи донишгоҳҳои беҳтарин қарор бигирад. Дар тули 30 соли мавҷудияти Донишгоҳ воқеаҳои муҳиму муҳташаме ба вуқуъ омаданд, ки дар таърихи он бо хатҳои заррин сабт шудаанд.

Дар оғози фаъолият ва марҳилаҳои тақдирсози Донишгоҳ нақш ва мавқеи олими варзидаи соҳаи кооператсияи тоҷик, иқтисодчии шоистаи Ҷумҳурии Тоҷикистон, профессори шодравон Арслонбек Ғозибеков, ки солҳои  1994-1999 вазифаи ректори донишгоҳро ба ўҳда дошт, назаррас аст.

Минбаъд, дар марҳилаҳои  рушди Донишгоҳ Арбоби шоистаи илм ва техникаи Ҷумҳурии Тоҷикистон, доктори илмҳои фалсафа, профессори шодравон Ҳомид Пўлодов,  профессорон Осим Каримзода, Ҷамшед Ҷўразода  ва Муъмин Шарифзода ҳамчун сарварони ин муассисаи бонуфуз нақши босазо гузоштаанд. Бахусус, аз соли 2006 марҳилаи сифатан нав дар Донишгоҳ оғоз ёфта, муҳимтарин дастоварди ин давр бо ибтикори Сарвари давлат муҳтарам Эмомалӣ Раҳмон вусъат ёфтани корҳои сохтмонӣ дар соли 2008 ва дар вазъияти тантанавӣ ба истифода супоридани бинои нави таълимӣ дар соли 2011 маҳсуб мешавад, ки дар таърихи Донишгоҳ бо хатҳои зарин сабт гардидааст.

Тибқи қарори Ҳукумати Ҷумҳурии Тоҷикистон аз 29 январи соли 2024 таҳти №24 Ҳошимзода Ҳомид Ҳасан ректори Муассисаи давлатии таълимии «Донишгоҳи давлатии ҳуқуқ, бизнес ва сиёсати Тоҷикистон дар шаҳри Хуҷанд» таъин гардид.

Бо ташрифи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оғоз ёфтани корҳои сохтмонӣ дар соли 2008, дар вазъияти тантанавӣ ба истифода супурдани бинои нави таълимӣ дар соли 2011, моҳи ноябри соли 2022 дар раванди корҳои созандагӣ ва таҷлили Ҷашни бошукӯҳи 30-солагии Иҷлосияи XVI Шурои Олии Ҷумҳурии Тоҷикистон ба истифода додани бинои маркази таҳсилоти рақамии Донишгоҳ бо тамоми шароитҳои зарурии муосир, дар  мустаҳкам гардидани заминаҳои моддиву техникии он мусоидат намуд ва ин марҳилаи сифатан нави рушду такомули ин маъвои саодати маънавӣ ба ҳисоб меравад.

Рисолати таърихии Донишгоҳ ба шарофати соҳибистиқлолӣ мазмуну мундариҷаи тозаро касб намуд ва имрӯз Донишгоҳ дар асоси Иҷозатнома аз рӯи ихтисосҳои амалкунанда, инчунин, Шаҳодатномаи аккредитатсияи давлативу байналмилалӣ фаъолият дорад.

Агар ба соли аввали таъсисёбии Донишгоҳ  мавҷудияти 2 факултет, 4 кафедра ва 300 донишҷӯ рост ояд, имрӯз теъдоди факултетҳо ба 7, кафедра ба 29 адад ва шумораи донишҷӯён наздик ба 8000 нафар расидааст.

Агар дар солҳои аввали таъсисёбии Донишгоҳ 63 омӯзгор, аз ҷумла 5 доктори илм, профессор, 2 номзади илм, дотсент фаъолият дошта бошанд, айни замон ба раванди таълиму тарбияи донишҷӯён 341 омӯзгор, аз ҷумла 21 доктори илм, профессор, 150 номзади илм, дотсент  ҷалб гардидааст. Ҳамзамон, Донишгоҳ бо мақсади боз ҳам беҳтар ба роҳ мондани раванди таҷрибаомӯзӣ ва бо ҷойи кори доимӣ таъмин намудани хатмкунандагон бо 167 корхонаю ташкилот  шартномаҳои ҳамкорӣ ба имзо расондааст.

Айни ҳол дар фаъолияти илмиву таълимии Донишгоҳ 1339 компютер, 95-то ноутбук, 212-то принтер, 160-то УПС, 12-то сканер, 193 проектор, 61 тахтаи электронӣ,  201 камераҳои назоратӣ ва 39-то телевизор мавриди истифода қарор дорад.

Зикр кардан ба маврид аст, ки дар солҳои аввали фаъолияти худ Донишгоҳ танҳо аз рӯи 7 ихтисос мутахассис  омода  менамуд. Ҳоло бошад, омода намудани мутахассисон аз рӯи 43 ихтисоси наву замонавӣ, вобаста ба самтҳои ҳуқуқшиносӣ, хадамоти гумрук, сиёсати дохиливу хориҷӣ, муносибатҳои байналмилалӣ, соҳибкорӣ, молия, иқтисод, идоракунӣ, инноватсия, телекоммуникатсия, системаи иттилоотӣ, муҳосибот, андоз, аудит, омор, соҳибкории иҷтимоӣ, иқтисодиёти рақамӣ, таъмини забонии робитаҳои байнифарҳангӣ, маркетинг ва ревизия ба роҳ монда шудааст.

Донишгоҳ давоми фаъолияташ зиёда аз 18 ҳазор мутахассиси соҳибтахассус ва ҷавобгӯ ба талаботи бозори меҳнатро омода намудааст.

Таҳкими заминаҳои моддию техникии раванди таълим ва пажӯҳишоти илмӣ, фаъолияти босамари лабораторияҳои муҷаҳҳаз бо технологияҳои муосири инноватсионӣ, толорҳои барҳаво, китобхонаи илмӣ ва электронӣ, марказҳои компютерӣ ва тестӣ, марказҳои омӯзиши Аврупо ва забонҳо, парки технологӣ, маҷмааи варзишӣ, маркази таҳсилоти рақамӣ, хобгоҳи замонавӣ, идомаи таҳсил дар донишгоҳҳои бонуфузи хориҷӣ, кор бо барномаҳои байналмилалӣ, таҷрибаомӯзӣ дар коргоҳу муассисаҳои пешқадам шароити мусоидест, ки барои таълиму тарбияи насли ояндасоз фароҳам оварда шудааст.

Тибқи  фармоиши раиси Комиссияи олии аттестатсионии назди Президенти Ҷумҳурии Тоҷикистон  аз 27 октябри соли 2017,  №46  дар назди Донишгоҳ таъсис ёфтани Шурои диссертатсионии 6D.KOA-023 барои дарёфти дараҷаи илмии доктори фалсафа (PhD),  доктор аз рӯи ихтисос доир ба ихтисоси 6D050600 – иқтисодиёт ва дарёфти дараҷаи илмии номзади илм ва доктори илм аз рӯи ихтисоси 08.00.05-иқтисодиёт ва идоракунии хоҷагии халқ: иқтисодиёт, ташкил ва идораи корхонаҳо, соҳаҳо, комплексҳо барои омода намудани кадрҳои илмӣ ва зиёдшавии теъдоди олимони ҷавони дараҷа ва унвони илмидошта заминаи мусоид фароҳам меоварад.

Имрӯз Донишгоҳ фаъолияти байналмилалиро бо шарикон ва ҳамкорони хориҷӣ густариш бахшида, дар ин раванд бо 86 муассисаи таълимиву марказҳои илмӣ ва созмонҳои байналмилалӣ шартномаҳои ҳамкорӣ ба имзо расондааст.

Ҳамкориҳои байналмилалии Донишгоҳ бо барномаҳои Иттиҳоди Аврупо Темпус, Эразмус Мундус ва Эразмус+, Маркази Конфутсий, Донишгоҳи Созмони ҳамкории Шанхай ва дигар донишгоҳҳои хориҷӣ ба роҳ монда шудааст.

Донишгоҳ узви донишгоҳҳои Созмони ҳамкории Шанхай, Лигаи донишгоҳии Созмони Аҳдномаи амнияти дастаҷамъӣ ва ассотсиатсияи донишгоҳҳои АвруОсиё мебошад.

Идомаи таҳсили донишҷӯён дар донишгоҳҳои бонуфузи хориҷӣ, бахусус ҷумҳуриҳои Қазоқистон, Россия, Белоруссия, Ӯзбекистон ва донишгоҳҳои кишварҳои Аврупою Амрико  доимӣ ба роҳ монда шудааст.

Дар асоси ҳамкориҳои мутақобила бо Ҷумҳурии Ӯзбекистон байни Вазоратҳои маориф ва илми Ҷумҳурии Тоҷикистон ва Ҷумҳурии Ӯзбекистон шартномаи ҳамкорӣ ба тасвиб расида, дар ҳамкории Донишкадаи ҳуқуқшиносии Тошкент, Донишкадаи молияи Тошкент ва Донишгоҳи давлатии ҳуқуқ, бизнес ва сиёсати Тоҷикистон дар пойгоҳи ҷониби тоҷикистонӣ сохтори нави таълимӣ – факултети муштарак ташкил шудааст. Факултети муштарак  аз рӯи ихтисосҳои ҳуқуқшиносӣ ва ҳуқуқшиносии байналмилалӣ, кори бонкӣ, молия ва қарз мутахассисонро омода менамояд. Ихтисосҳои зикршуда дорои сертификати аккредитатсияи байналмилалӣ буда, ба хатмкунандагон дипломҳои расмии ҳар ду давлат дода мешаванд.

Саҳифаҳои таърихи Донишгоҳ бозгӯи онанд, ки дар такя ба тадбирҳои амалинамудаи Ҳукумати мамлакат бунёд, таъмиру азнавсозии иншооти муҳим, бахусус ифтитоҳи нахустин синфхонаи компютерӣ (1995), матбааи хурди Донишгоҳ (2000), бинои нави китобхона (2006),  хобгоҳи Донишгоҳ (2008), бинои нави таълимӣ (2011),  осорхона (2010),  Литсейи назди ДДҲБСТ (2011), таъсиси парки технологӣ (2012), азнавсозии даромадгоҳи асосии Донишгоҳ ва таъмири маҷлисгоҳ бо насби экрани калонҳаҷм (18м2) (2018), маҷмааи варзишии дуошёна бо тамоми шароитҳои зарурӣ муҷаҳҳаз бо лавозимоти варзишии муосир (2019), бинои дуошёна барои факултети муштарк бо лавозимоти техникиву таълимии мусоир (2020), бинои дуошёнаи маркази таҳсилоти рақамӣ бо фарогирии 20 синфхонаи таълимӣ,  3 ҳуҷраи лексионӣ, 4 ҳуҷраи корӣ барои устодон, маркази тестӣ, ҳуҷраҳои алоҳида барои маркази таҳқиқотии таҷрибаи давлатдории Пешвои миллат, маркази таълимии хизматрасонии бонкии “Амонатбонк”, “Тавҳидбонк” ва “Матин”, синфхонаи “Иқтисодиёт дар замони Истиқлол”, маркази омӯзиши забонҳои хориҷӣ, лабораторияи криминалистӣ, маркази шуғли фосилавии парки технологӣ, толори лексионии инноватсионӣ ва студияи сабти барномаҳои телевизионӣ бо шароитҳои муосиртарини таълим (2022) барои рушди зинаи таҳсилоти олӣ ва таҳкими заминаҳои моддию техникӣ  мусоидат намуда истодааст.

Ҳоло бунёд ва азнавсозии иншооти сохтмонаш нотамоми маҷлисгоҳ барои 800 ҷойи нишаст идома дошта, ҳамзамон, раёсати Донишгоҳ сохтмони бинои истиқоматии баландошёнаро барои омӯзгорону кормандон, ки ҷиҳати оғози сохтмони он санаи 15 ноябри соли равон Пешвои муаззами миллат санги асос гузоштанд то ҷашни 35-солагии Истиқлоли давлатии Ҷумҳурии Тоҷикистон ба нақша гирифтааст.

Факултетҳои донишгоҳ

Ҳуқуқшиносӣ

Бизнес ва иқтисодиёти  байналмилалӣ

Молия ва андоз

Технологияҳои инноватсионӣ ва баҳисобгирии бухгалтерӣ

Сиёсатшиносӣ ва муносибатҳои байналмилалӣ

Факултети муштараки ДДҲБСТ бо Донишгоҳи молияи Тошканд