ДДҲБСТ: Конференсияи байналмилалии илмӣ – амалӣ таҳти унвони «Иқтисодиёти рақамӣ: қарорҳои инноватсионӣ ва имкониятҳои татбиқи онҳо»
28- уми марти соли 2025, дар Донишгоҳи давлатии ҳуқуқ, бизнес ва сиёсати Тоҷикистон конференсияи илмӣ – амалӣ таҳти унвони «Иқтисодиёти рақамӣ: қарорҳои инноватсионӣ ва имкониятҳои татбиқи онҳо”, бахшида ба эълон гаштани соли 2025-2030 «Солҳои рушди иқтисоди рақамӣ ва инноватсия» ташкил ва баргузор гардид. Дар кори конференсия коршиносон, олимону муҳаққиқон, мутахассисони соҳа, кормандони муассисаҳои илмию таълимии кишварҳои хориҷӣ ширкат варзиданд.
Ҷаласаи пленарии конференсияро муовини ректор оид ба илм ва инноватсия, д.и.и., профессор Бобоҷониён Даврон Дадоҷон ҳусни ифтитоҳ бахшида, меҳмононро муаррифӣ намуд.
Ў перомуни баромади худ нуктаҳои асоси и барои ташаккул ва рушди иқтисоди рақамӣ, ки аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар Паёми навбатии худ ироа гардид, баён намуд: “Тоҷикистон дар ҷодаи гузариш ба рақамикунонии соҳаҳои иқтисоди миллӣ ҷиҳати таъмин намудани шаффофияти муносибатҳои иқтисодиву молиявӣ қадамҳои устувор гузошта истодааст. Дар панҷсолаи минбаъда ҷиҳати пешбурди иқтисоди рақамӣ бояд ба самтҳои зерин диққати аввалиндараҷа дода шавад:
Якум, такмили фаврии заминаҳои ҳуқуқӣ ва қабули санадҳои дахлдор дар самти гузариш ба иқтисоди рақамӣ.
Дуюм, то шабакаҳои панҷ – ҷӣ (5G) инкишоф додани инфрасохтори рақамӣ, рушди марказҳои коркарди маълумот, таъсиси махзани мукаммали миллии маълумот.
Сеюм, рақамикунонии пурраи хизматрасониҳои давлатӣ ва ташкили махзани ягонаи хизматрасониҳои давлатӣ.
Чорум, рушди сармояи инсонӣ бо роҳи омӯзиш ва бозомӯзии кадрҳо доир ба технологияҳои иттилоотӣ дар дохил ва хориҷи кишвар ва баланд бардоштани маърифати истифодаи технологияҳои рақамӣ.
Панҷум, истифодаи васеи зеҳни сунъӣ дар пешниҳоди хизматрасониҳо ва низоми бақайдгирии давлатӣ.
Шашум, андешидани чораҳо дар самти таъмин намудани амнияти киберии махзанҳои маълумот.
Ҳафтум, ташаккул додани соҳибкории рақамӣ ва рушди савдои электронӣ”.
Аз ин ҷост, ки дар шароити муосир иқтисодиёти рақамӣ яке аз самтҳои авлавиятноки рушди Ҷумҳурии Тоҷикистон ба шумор меравад. Бинобар ин, солҳои охир кишвари мо бахши рақамии худро дар сатҳи баланд рушд дода истодааст. Лекин ҳаминро дар назар дошт, ки раванди рақамикунонӣ сабаби табаддулот (дигаргунӣ)-и иқтисодиёт ва ҷомеаи имруза гардида истодааст. Яъне ин раванд метавонад ҳам имконият ва ҳам мушкилоти зиёд барои рушди устувор фароҳам оварад. Бинобар ин, омўзиш, таҳлил ва муайян намудани вазъи ҳозира ва ояндаи рушди иқтисодиёти рақамӣ барои кишварамон мубрамияти заруриро дорад.
Аз ин хотир, дар ҳошияи тадбирҳои судманди Роҳбари давлат тасмим гирифтем, ки ҷиҳати дарёфти роҳҳои ҳалли масъалаҳои марбут ба рушди иқтисодиёти рақамӣ ва истифода шудани имкониятҳои технологияҳои муосир бо олимону коршиносон ва мутахассисони соҳавӣ майдони муколама ва мубодилаи афкор ташкил намоем.
Дар идомаи кори конференсия Арбоби шоистаи илм ва техникаи Ҷумҳурии Тоҷикистон, профессори кафедраи иқтисодӣ-муҳандисӣ ва менеҷменти Донишкадаи политехникии Донишгоҳи техникии Тоҷикистон ба номи академик М.Осимӣ Назаров Абдушукур Абдурахимович, муҳандиси IT ФҶСК “Тавҳидбонк” дар ш. Хуҷанд Бобоназаров Шаҳбоз Айёмҷонович, сардори идораи лоиҳавии ГШ “ФАРОВОН” Арипов Махсуд Маҳмудович, мутахассиси тиҷоратии ҶСП ТАҚХ “Имон Интернешнл” Исомаддинов Ҷамолиддин Ҳусейнович, муаллими калони кафедраи технологияҳои иттилоотию коммуникатсионӣ ва барномарезӣ Муродов Маскурбек Келдибекович, ҳамчунин тариқи маҷозӣ (онлайн) н.и.и, дотсенти кафедраи молия ва баҳисобгирии Донишгоҳи давлатии Курски Федератсияи Россия Осиневич Людмила Михайловна ва н.и.и., мудири кафедраи омори Донишгоҳи давлатии иқтисодии Белоруссия Высотский Станислав Юревич маърӯзаҳо намуда, андешаҳои хешро иброз доштанд.
Қайд гардид, ки солҳои охир рушд бахшидани иқтисоди рақамӣ ва татбиқи онҳо ба яке аз ҳадафҳои муҳимми Ҳукумати Ҷумҳурии Тоҷикистон табдил ёфтааст. Таҷрибаи кишварҳои пешрафта баёнгари он аст, ки дар шароити рушди технологияи рақамӣ дар беҳбудии соҳаҳои дигари ҳаёти ҷамъиятӣ аз имкониятҳои он метавон истифода бурд. Лозим ба ёдоварист, ки дар шароити имрӯзаи Тоҷикистон рушди иқтисоди рақамӣ аз бисёр ҷиҳат муҳим ва саривақтӣ буда, истифодаи иқтисоди рақамӣ ҷиҳати муқовимат бо зуҳуроти номатлуби коррупсионӣ дар кишвари мо муҳим мебошад.
Дар анҷоми маърўзаҳои илмӣ байни иштирокчиён ва меҳмонон, роҷеъ ба муаммоҳои иқтисодиёти рақамӣ музокироти судманди илмӣ ҷараён гирифт.
Ҳамчунин, дар идомаи конференсия аз тарафи мутахассисони IT ФҶСК “Тавҳидбонк”байни донишҷўён озмун гузаронида шуд. Ҳадаф аз ташкили озмун, расонидани кўмаки моддӣ ба мизоҷон -донишҷўён, ки ба корти бонки мазкур пайваст ва дар истифодабарӣ фаъол мебошанд. Аз рўи қурьакашӣ ба ғолибони озмун, ки зиёда аз 10 нафарро ташкил дод, Сертификат дар ҳаҷми 30%, 50%, 100% тақдим карда шуд.
Дар ҷамъбаст иштирокчиёни ҳамоиши байналмилалӣ барои маърӯзаҳои пурмӯҳтаво бо Сипоснома ва тӯҳфаҳои хотиравии донишгоҳ сарфароз гардонида шуданд.
Бояд зикр кард, ки кори конференсия тибқи барнома дар бахшҳо идома ёфта, дар он олимону мутахассисони соҳа ва омўзгорон маърўзаҳои илмӣ намуданд
.
Шуъбаи таҳлил ва робита бо ҷомеа