Густариши ҳамкориҳои Донишгоҳи давлатии ҳуқуқ, бизнес ва сиёсати Тоҷикистон дар доираи барномаҳои байналмилалӣ

Санаҳои  15 – 25 марти соли 2025 муовини ректор оид ба робитаҳои байналмилалӣ, доктори илмҳои иқтисодӣ, профессор Ризозода Тўра Раббим барои иштирок дар барномаи байналмилалии Erasmus+ ба Донишгоҳи Гдански Ҷумҳурии Полша сафари корӣ намуд.

Бояд зикр кард, ки соли 2024 тибқи супориши раёсати Донишгоҳ, бо ташаббуси шуъбаи робитаҳои байналмилалӣ ва дархости мудири шуъбаи робитаҳои байналмилалӣ, дотсент Шарипов Комилҷон бо мактуб ба якчанд муассисаҳои таҳсилоти олии касбии ҷаҳон,  ризоияти ҳамкорӣ ва Ёддошти тафоҳум бо Донишгоҳи Гдански Ҷумҳурии Полша, оид ба иштироки донишгоҳамон дар барномаи Erasmus+ ба имзо расид.

Дар натиҷаи ин ҳамкориҳои судманд, хушбахтона, бори аввал намояндаи донишгоҳамон дар барномаи Erasmus+ ба Донишгоҳи Гданск сафарбар шуд.

Айни ҳол, ҳамкориҳо бо Донишгоҳи мазкур густариш ёфта, дар вохӯрӣ бо роҳбарияти Донишгоҳ профессор Ризозода Т. Р. масъалаҳои табодули академии омӯзгорон ва донишҷӯён, сафарбар кардани омӯзгорон барои хондани лексияҳо ва дигар самтҳои ҳамкориро баррасӣ намуд.

Тибқи натиҷаҳои ин сафар, роҳандозии табодули академии омӯзгорону донишҷӯён дар назар аст. Ин иқдом барои боло бурдани сатҳу сифати таълим, касб намудани таҷрибаи байналмилалӣ ва таҳкими мавқеи донишгоҳ дар доираи муассисаҳои таҳсилоти олии касбии ҷаҳон (ТОП-1000) саҳми арзанда хоҳад гузошт.

Шуъбаи таҳлил ва робита бо ҷомеа