Бобоҷониён Даврон Дадоҷон – муовини ректор оид ба илм ва инноватсия, доктори илмҳои иқтисодӣ, профессор

Бобоҷониён Даврон Дадоҷон, профессор, доктори илмҳои иқтисодӣ, муовини ректор оид ба илм ва инноватсияи Донишгоҳи давлатии ҳуқуқ, бизнес ва сиёсати Тоҷикистон (ДДҲБСТ), соли таваллуд 1974, зодаи шаҳри Хуҷанд. Ў соли 1991 мактаби таҳсилоти миёнаи умумии № 15-и шаҳри Хуҷандро хатм кардааст.

Бобоҷониён Даврон соли 1996 факултети иқтисодии Донишгоҳи давлатии Хуҷандро бомувафаққият ба итмом расонда, фаъолияти меҳнатиашро худи ҳамон сол ба ҳайси ассистенти кафедраи назарияи иқтисодии Донишгоҳи давлатии ҳуқуқ, бизнес ва сиёсати Тоҷикистон оғоз менамояд. Солҳои 1998-2002 аспиранти Академияи улуми Ҷумҳурии Тоҷикистон буд. Тайи солҳои 2003-2012 дар вазифаи мудири кафедраи иқтисодӣ ҷаҳон ифои вазифа менамояд. Дар ин муддат дар такмили сифату самаранокии фаъолияти кафедра, пешрафти кори таълиму тарбия, зиёд намудани сафи аълочиён ва беҳбудии интизоми донишҷўён кўшиш ба харҷ медиҳад. Дар сатҳи баланди илмию назариявӣ ташкил намудани машғулиятҳои таълимӣ, ташвиқу тарғиби дастовардҳои илмии омўзгорон ва кормандони кафедра, мусоидат дар такмили ихтисоси омўзгорон меҳвари асосии фаъолияти ўро ташкил медод.

Соли 2004 дар Шурои диссертатсионии Донишгоҳи аграрии Тоҷикистон дар мавзуи «Муаммоҳои инкишофи хоҷагиҳои деҳқонӣ (фермерӣ) дар вилояти Суғд дар шароити гузариш ба иқтисоди бозорӣ» рисолаи номзадиашро дифоъ мекунад ва соҳиби дараҷаи илмии номзади илмҳои иқтисодӣ мегардад.

Бобоҷониён Д.Д. ҳамчун олими ҷавон пайваста аз пайи такмили илму дониш шуда, соли 2011 дар Шурои диссертатсионии Институти иқтисодиёти кишоварзии Академияи илмҳои кишоварзии Тоҷикистон дар мавзўи «Асосҳои ташкилию иқтисодии ташаккул ва инкишофи сектори органикии Тоҷикистон» рисолаи докториашро ҳимоя менамояд ва соҳиби дараҷаи илмии доктори илмҳои иқтисодӣ мегардад.

Моҳи майи соли 2012 бо фармоиши Вазири маорифи Ҷумҳурии Тоҷикистон муовини ректор оид ба корҳои таълими Донишгоҳи давлатии ҳуқуқ, бизнес ва сиёсати Тоҷикистон таъин гардида, то моҳи декабри соли 2017 дар ин вазифа фаъолият менамояд.  Дар ин муддат раванди таълимро мунтазам мақсаднок ба роҳ монда, дар такмил ва дар амал татбиқ намудани усулҳои нави таълим, дарёфти усулҳои муосири таълимӣ, баланд бардоштани сатҳу сифати таҳсилот, такмили низоми кредитии таҳсилот, вусъат бахшидани самтҳои фаъолияти таълимию методии донишгоҳ саҳм гузоштааст.

Аз моҳи январи соли 2018 то моҳи апрели 2018 ба ҳайси сармутахассиси шуъбаи робитаҳои байналхалқӣ ва баъдан то моҳи августи соли 2018 иҷрокунандаи вазифаи декани факултети молияи ДДҲБСТ фаъолият дошт. Тайи солҳои соли 2018-2024 вазифаи муовини ректор оид ба робитаҳои байналмилалии Донишгоҳи давлатии ҳуқуқ, бизнес ва сиёсати Тоҷикистонро ба зимма дошт.

Бо фармоиши вазири маориф ва илми Ҷумҳурии Тоҷикистон аз 05 апрели соли 2024, №386 ба вазифаи муовини ректор оид ба илм ва инноватсияи Муассисаи давлатии таълимии “Донишгоҳи давлатии ҳуқуқ, бизнес ва сиёсати Тоҷикистон” таъин гардид.

Бобоҷониён Д.Д. аъзои Шурои диссертатсионии 6D.КОА-013-и назди ДДҲБСТ мебошад. Мавсуф муаллифи зиёда аз 4 монография ва 86 мақолаҳои илмӣ буда, якчанд таълифоташ дар маҷаллаҳои илмии Федератсияи Русия ба нашр расидааст. Таҳти роҳбарии Бобоҷониён Д.Д. беш аз даҳ нафар шогирдон рисолаҳои илмӣ ҳимоя намуда, соҳиби дараҷаи илмии номзади илмҳои иқтисодӣ гаштанд. Рисолаҳои номзадии якчанд докторантон ва аспирантону унвонҷуёнро роҳбарӣ менамояд.

Барои меҳнати содиқона ва пурмаҳсулаш соли 2007 бо Ифтихорномаи Вазорати маорифи Ҷумҳурии Тоҷикистон қадршиносӣ шудааст. Дар асоси фармони Вазорати маориф ва илми Федератсияи Русия аз 31.12.13, №1036/нк-1, соҳиби унвони илмии профессор мебошад. Соли 2014 унвони Аълочии маориф ва илми Ҷумҳурии Тоҷикистонро сазовор гардидааст. Бо фармони Президенти Ҷумҳурии Тоҷикистон аз 28.07.2017, №904 бо медали Хизмати шоиста мукофотонида шудааст.

Телефон: (+992) (92 773 46 46); Телефон: (+992) 3422 23594

Email: bobojonovd@rambler.ru

Таълифоти илмӣ