=ТАҲНИЯТ

     ҶАШНҲОИ ҲАМДИЛӢ – РАМЗИ ПИРЎЗИВУ ХУШБАХТӢ

Дар таърихи давлату миллатҳои ҷаҳон  санаҳои муқаддасу муътабар ва рўйдодҳои сарнавиштсозу муҳиме арзи вуҷуд менамоянд, ки аҳамият ва мақому манзалати онҳо бо мурури замон бемайлон баландтар ва самараашон беш аз пеш назаррастар гардида,

бо эътирофи ҳамагон ба сарвати гаронбаҳотарини миллӣ мубаддал мегарданд. Барои халқи сарбаланди Тоҷикистон  Рўзи Ваҳдати миллӣ  аз ҷумлаи чунин санаҳои мубораки таърихӣ ва сарнавиштсоз маҳсуб мешавад.

Воқеан, Ваҳдати миллӣ беҳтарин аломати шукуфоии Ватан маҳсуб мешавад, зеро дар давлате, ки сулҳу амонӣ ва дўстӣ ҳукмфармо бошад, он давлат пайваста гул-гул мешукуфад, иқтисодиёташ тадриҷан инкишоф меёбад, дар натиҷа, кишвар ҳам аз ҷиҳати сиёсӣ ва ҳам фарҳангӣ пеш меравад. Ин иди фархунда тимсоли сулҳ, ҳамдигарфаҳмӣ ва осоиши ҷомеа буда, боиси эҳёи маънавию иқтисодии кишвар, масъулияти умумии мо барои ҳаёти ҳозираву ояндаи неки Тоҷикистон мешавад.

Ормонҳои сулҳ ва Ваҳдати миллӣ аз ҳар кадоми мо- аҳли ҷомеа, аз ҷумла  аз кормандони  соҳаи маориф бо донишҳои муосири илмиву техникӣ  мусаллаҳ гардонидани ҷавонон  ва фароҳам овардани шароити мусоид барои ширкати фаъолонаи онҳоро дар ободу зебо гардонидани Ватан тақозо менамояд.

Боиси ифтихор аст, ки бо кушишу заҳматҳои шабонарўзии Асосгузори сулҳу Ваҳдати миллӣ- Пешвои миллат Президенти Ҷумҳурии Тоҷикистон Эмомалӣ Раҳмон дастовардҳои мардуми шарифи Тоҷикистон, аз ҷумла донишгоҳамон дар давраи соҳибистиқлолӣ, алалхусус, пас аз парафшонии хуршеди Ваҳдати миллӣ беш аз пеш фараҳбахштар мешаванд. Бо камоли ифтихор таъкид медорам, ки ДДҲБСТ дар китоби таърих чун зода ва парвардаи Истиқлол ва Ваҳдати Тоҷикистон бо ҳарфҳои заррин сабт хоҳад шуд, ки саҳми ҳамаи Шумо-устодону донишҷуёни арҷманд назаррас аст.

Бо фаъолияти ибратпазири омўзгорону коромандон ва хониши хубу аълои  донишҷўён мо метавонем дар шукуфоии ватани азизамон саҳмгузор бошем.

Дар ин ҷода, иҷрои саривақтии дастуру супоришҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар Паёмҳои ҳамасолаи худ ба Маҷлиси Олии Ҷумҳурии Тоҷикистон ва зимни вохўриашон ба муносибати Рўзи дониш – Дарси сулҳ дар Донишгоҳи давлатии Данѓара (1.09.2016) баён намуданд, иҷрои босифати қарорҳои Ҳукумати Ҷумҳурии Тоҷикистон, қарорҳои мушовараи Вазорати маориф ва илми Ҷумҳурии Тоҷикистон ҷиҳати боз ҳам беҳтар намудани сатҳу сифати таълиму тарбия, тайёр кардани мутахассисони баландихтисоси ҷавобгўи талаботи давру замон, саҳм гузоштан дар рушду инкишофи соҳаҳои мухталифи илму иқтисоди кишвар ва ба ин васила сазовор пешвоз гирифтани ҷашнҳои таърихии 20-солагии Ваҳдати миллӣ, 25- солагии Иҷлосияи тақдирсози XVI Шўрои Олии Ҷумҳурии Тоҷикистон ва бо муваффақиятҳои фараҳбахш хотирнишон сохтани Соли ҷавонон корҳое хоҳанд буд, ки аз ҳамаи мо кўшишу ѓайрат ва ҳиммати пайваста тақозо менамоянд.

Ҳамзамон, ёдовар мешавам, ки  мо ҳам дар арафаи ҷашни Ваҳдати миллӣ ва ҳам моҳи мубораки Рамазон ва иди саиди Фитр, ки  бисёр иди  муқаддас  барои  мардуми мо мебошад, қарор дорем. Хусусияти хоси ин моҳи муборак аз он иборат аст, ки дар ин моҳ аз пештар дида бештар мусалмонони кишвар ба беҳтарин арзишҳои инсонӣ - сабру таҳаммул, некиву накӯкорӣ, дастгирии ҳамдигар, раҳму шафқат, бахшиши гуноҳ ва ба амали хайру созанда рў моранд ва омўзонидани ин амалҳои хайр барои насли имрўзу фардо аз Шумо устодони арҷманд сарчашма мегирад. Иди саиди Фитр бароямон рамзест, ки мо шукрона аз неъматҳои истиқлолияту озодӣ, сулҳу субот, оромиву ободии кишвар ва аз рӯйи имону эътиқод дӯст доштани Ватанро менамоем.                         

Аз мавриди муносиб истифода карда, ҷомеаи меҳнатӣ, ҳайати  профессорону устодон, донишҷўёнро бо ҷашни саиду фархундаи бистумин солгарди Ваҳдати миллӣ - ба имзорасии Созишномаи умумии истиқрори сулҳ ва ризоияти миллии тоҷикон  ва  фаро расидани иди саиди Фитр табрик менамоям.

Бароятон дар ин рўзҳои фараҳбахш рўзгори ободу осоишта, хотири шоду болида ва муваффақиятҳои нав ба навро орзумандам.           

Иди Ваҳдати миллӣ ва Иди  саиди Фитр муборак устодон ва донишҷўёни арҷманд!

                                                             ШАРИФЗОДА Мумин Машокир,

ректори Донишгоҳи давлатии

ҳуқуқ, бизнес ва сиёсати

Тоҷикистон, доктори илмҳои

иқтисодӣ, профессор

 

http://www.zoofirma.ru/