Муборакбодӣ

Наврўз ҷавон кард ба дил пиру ҷавонро!

Шарифзода Муминҷон Машокир,

ректори Донишгоҳи давлатии ҳуқуқ, бизнес ва сиёсати Тоҷикистон, доктори илмҳои иқтисодӣ, профессор

НАВРЎЗИ ФАРРУХПАЙ, ки маҳз ба шарофати арзиши беҳамторо доро буданаш, барҳақ, ба Иди байналмилалӣ табдил ёфтааст ва айни замон ин вожаи зебои тоҷикӣ  беш аз пеш бо лаҳну оҳангҳои аҷоибу ғароиб вирди забони миллату халқиятҳои мухталифи ақсои олам мешавад, дар сарзамини биҳиштосои мо- Тоҷикистони нозанин бо шаҳомат ва ҳусни хосса аз ҳастии хештан дарак медиҳад. Тоҷикони фархундаиқбол Наврўзи имсоларо бо хурсандӣ ва масъулияти дучандон пазиро мешаванд, зеро, феълан,  меҳвари ин иди пуршукўҳи байналмилалӣ кишвари мо баргузида шудааст. Бале, Тоҷикистон Ватани Наврўз буду то абад чунин хоҳад буд! Боиси сарафрозиҳои пиру барнои диёри азизамон  аст, ки ба шаҳру навоҳии гулафшони мо аз мамлакатҳои  ҳамҷавор ва хориҷаи дур меҳмонони сершумор ташриф мефармоянд ва бо расму оинҳои ибратпазири наврўзии тоҷикон - бунёдгузорони ин ҷашни беҳамто аз наздик ошно мешаванд.

Дар робита ба ҷойгоҳи басе волои Наврўз дар ташаккул ва равнақи ибратпазири тамаддуни тоҷикон Асосгузори сулҳуваҳдат- Пешвои миллат, Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон ишораи муассире доранд: «Наврўз барои миллати тоҷик китоби сарнавишт буда, ниёгони мо, ҳатто, дар давраҳои мушкилтарини таърихӣ ин ҷашни муқаддас ва хуҷастаи худро ҳимоят мекарданд ва бо Наврўз дубора зинда мешуданд. Наврўз ҳамчун ҷавҳари тобнок ва нишонии ҷовидонаи тамаддуни халқи тоҷик ҳамеша нигоҳдорандаи мардум, забон, расму ойин, фарҳангу таърих ва ниҳоят, Ватан будааст». Ҳидояти Пешвои миллат далолат бар он менамояд, ки ба қадри расми аҷдодӣ бирасем ва тамоми тадбирҳоро бияндешем, ки Наврўзи гетиафрўз пайваста дар сатҳи дилпазир таҷлил карда шавад.

Боиси қаноатмандист, ки ҷашни ҳумоюни ниёгонро профессорону омўзгорон, донишҷўён ва кормандони соҳаҳои гуногуни хоҷагии донишгоҳамон дар рўҳияи волои сарафрозию шукргузорӣ аз ғамхориҳои рўзафзуни Ҳукумати кишварамон бо муваффақиятҳои сурурбахши меҳнатӣ пешвоз мегиранд. Шоистаи таҳсин аст, ки айни замон дар Донишгоҳи давлатии ҳуқуқ, бизнес ва сиёсати Тоҷикистон 376 нафар омўзгор дар иҷрои рисолати муқаддаси инсонӣ - таълиму тарбияти насли наврас ва ҷавонони толеъбаланди тоҷик камари ҳиммат бастаанд. Ин ҷониб, ки дар арафаи тантанаҳои наврўзӣ бо супориши Ҳукумати Ҷумҳурӣ ва ҳидояти бевоситаи Пешвои миллат, Президенти Ҷумҳурии Тоҷикистон, Ҷаноби Олӣ, муҳтарам Эмомалӣ Раҳмон сарварии ин даргоҳи қудсии маърифатро бо камоли масъулият ба зимма  гирифтаам, бо эҳсоси бузурги ифтихор арз менамоям, ки аз теъдоди умумии устодон 20 нафар докторони илм ва бештар аз 110 нафар номзади илмҳои мухталиф ба шумор мераванд. Даҳҳо нафар аспирантону унвонҷўёни боргоҳи маърифати мо машғули корҳои муҳими илмӣ буда, дар остонаи ҳимояи рисолаҳои хештан қарор гирифтаанд.

Бо вуҷуди навтаъсис будани донишгоҳ мақому манзалати он байни мардум, бахусус, ҷавонон беш аз пеш баланд мешавад ва сафи ҷўяндагони илму ҳунари пешқадами муосир дар ин даргоҳ дар вазъи афзуншавии доимист. Таъкидаш бароям басе гуворост, ки бисту се сол  муқаддам, гоҳи ташкилёбии маъвои хиради мо он ҳамагӣ як факултет ва 300 нафар толибилмро ба ҳам оварда буд. Файзу баракати Истиқлолро бубинед, ки имрўз дар 6 факултет зиёда аз 6200 нафар ҷавонон таҳсил менамоянд. Ҳисоб кардан душвор нест, ки аз Наврўзи соли барои Меҳани азизамон мудҳиши 1994 то ба айни замон нуфуси донишҷўён ва устодони онҳо бештар аз 20 карат афзун гардидааст, ки инро, бидуни шубҳа, қадамҳои баҳодурона арзёбӣ кардан шоиста хоҳад буд.

Дар Маркази миллии тестии назди Президенти Ҷумҳурии Тоҷикистон ба ҷо овардани имтиҳоноти қабул ба бемайлон баланд гардидани ҷойгоҳи донишгоҳи мо мусоидат менамояд. Тибқи натиҷаҳои санҷиши порсола 1371 нафар довталаби муваффақ ба гирифтани унвони толибилмӣ мушарраф гардиданд, ки нисбат ба соли пешина хеле зиёд мебошад. Теъдоди хоҳишмандон аз вилоятҳои Хатлон, Мухтори Бадахшони Кўҳӣ, навоҳии тобеи ҷумҳурӣ ва кишварҳои хориҷӣ тадриҷан афзун мешавад.

Дастовардҳои ҷомеаи меҳнатии ДДҲБСТ- ро батафсил ташреҳ додан  имкониятҳои бештаре тақозо менамояд. Ҳоло бошад, аз фурсати созгор истифода карда, чанд нуктаи муҳимро ба ҳайси армуғонҳои наврўзӣ ба самъи хонандагони арҷманд мерасонам ва бо ҳамин иктифо менамоям.  Тибқи мониторинги Вазорати маориф ва илми Ҷумҳурии Тоҷикистон  донишгоҳи мо байни 33 мактаби олии касбии мамлакат дар радифи 10 муассисаҳои беҳтарин ҷой дода шуд. Ин эътироф бори дигар асоси комил доштани баҳои Пешвои миллатамонро дар ҳаққи боргоҳи маърифати мо собит менамояд. Ҷаноби Олӣ ҳанўз соли 1995-ум, ҳамагӣ баъди як соли таъсиси ДДҲБСТ дар мусоҳибаашон дар маҷаллаи «Деловой мир» паямбарона чунин пешгўӣ карда буданд: «Донишгоҳи ҳуқуқ, бизнес ва сиёсати Тоҷикистон дар ислоҳоти қонунгузорӣ «маркази зеҳнӣ» гардида, дар соҳаҳои соҳибкорӣ, фаъолияти тиҷоратӣ ва ҳуқуқи байналхалқӣ мутахассис тайёр мекунад». Боргоҳи маърифати мо ба хотири сазовор будан ба чунин эътимоди қавии Раҳбари давлат ва Пешвои миллат пайваста кўшишу ғайрат зоҳир менамояд.

Дар олимпиадаи ҷумҳуриявӣ барои дарёфти «Ҷоми Академияи илмҳои Ҷумҳурии Тоҷикистон» се нафар донишҷўёни мо ғолибият ба даст оварданд. Боз ба як тан толибилми ДДҲБСТ дар озмуни ҷумҳуриявии мактабҳои олии касбӣ «Донишҷўи беҳтарини сол-2016»  чашидани шаҳди зафар насиб гардид. Дар Спартакиадаи донишҷўёни  мактабҳои олии касбии вилоятамон аз 149 нафар ширкатдорони донишгоҳи мо 102 нафар дар сафи ғолибон мақом ёфта тавонистанд. Боиси ифтихори мост, ки аз эшон 13 нафар ба гирифтани медали тилло мушарраф шуданд.

Иқрор мешавам, ки муждагониҳои арздоштаам, бемуҳобот, қатрае аз баҳр ба ҳисоб мераванд. Барҳақ ҳам, дар факултетҳо, Литсейи донишгоҳӣ, китобхона, парки технологӣ, дар ҷодаҳои мухталифи рўзгори хоҷагии маъвои хиради мо ҳаёт ҷўш мезанад ва мураттабии набзи онҳоро заҳматҳои бедареғи ҳамагон таъмин месозанд. Табиист, ки Наврўзи оламафрўз бо хилқати офарандагии худ ба ҳар кадом узви ҷомеаи ҳимматбаланди Донишгоҳи давлатии ҳуқуқ, бизнес ва сиёсати Тоҷикистон ҷаҳду кўшишҳои дучандон бахшида, онҳоро ба сўи комёбиҳои нав ба нав ҳидоят мекунад. Бигзор, чунин бошад!

Инак, мавриде фаро мерасад, ки ҷумлаи аҳли донишгоҳ ва, албатта, дар шахсияти эшон аъзои  хонаводаҳояшон, ҳамаи дўстону пайвандонашонро бо фирўзтарин рўзи зиндагии инсоният- Растохези табиат, Наврўзи хуҷастапай аз самими дил муборакбод менамоям ва ба ҳамагон тамоми хушиҳои зиндагиро таманно карда, итминони комил дорам, ки ҳама рўзашон Наврўз хоҳад буд.

Ҳумоюн бод Наврўз, азизон! 

http://www.zoofirma.ru/